समर्थ रामदास स्वामींच्या भूमिकेत विक्रम गायकवाड ...

समर्थ रामदास स्वामींच्या भूमिकेत विक्रम गायकवाड ...

 * सिने प्रतिनिधि

        आपला महाराष्ट्र संतांची भूमी म्हणून ओळखला जातो. या महाराष्ट्रात अनेक थोर संतांपैकी एक संत म्हणजे “समर्थ रामदास स्वामी”. स्वधर्म-स्वदेश-आणि स्वदेव याची मुहूर्तमेढ रोवून दासबोध, मनाचे श्लोक, सुखकर्ता दुःखहर्ता रचणारे समर्थ रामदास स्वामी यांचा चरित्रपट “रघुवीर" आता लवकरच मोठ्या पडद्यावर अवतरणार आहेत. दिग्दर्शक निलेश कुंजीर यांनी रामदास स्वामींचे जीवनचरीत्र चित्रपट रूपात जगासमोर आणण्याचं शिवधनुष्य उचललं आहे. टेलिव्हीजनपासून चित्रपटांपर्यंत नेहमीच वेगवेगळ्या प्रकारच्या भूमिका साकारणारे अभिनेते विक्रम गायकवाड 'रघुवीर'मध्ये रामदास स्वामींच्या भूमिकेत दिसणार आहेत.

       सिनेमास्टर्स एन्टरटेन्मेंटची प्रस्तुती असलेल्या 'रघुवीर'ची निर्मिती डायनॅमिक प्रोडक्शन्स आणि आदित्यम क्रिएशन्सच्या सहयोगानं समर्थ क्रिएशन्सनं यांनी केली आहे. अभिनव विकास पाठक आणि अरविंद सिंह राजपूत या चित्रपटाचे निर्माते असून, वैभव किशोर मानकर, सपना किरण बडगुजर आणि डॅा. किरण छगन बडगुजर सहनिर्माते आहेत. समीर दीक्षित आणि ऋषिकेश भिरंगी यांच्या पिकल एन्टरटेन्मेंट अँड मीडिया प्रा. लि.कडे वितरणाची जबाबदारी सोपवण्यात आली आहे. या चित्रपटाचे दिग्दर्शक निलेश कुंजीर यांनी केलंय  'रघुवीर'च्या रूपात त्यांनी आजवर कधीही चित्रपट रूपात समोर न आलेल्या एका महान संताचं चरित्र प्रेक्षकांसमोर सादर करण्याचं आव्हान स्वीकारलं आहे. याआधी त्यांनी दिग्दर्शित केलेला आदिनाथ कोठारे याची मुख्य भूमिका असलेला “शेवंती" हा लघुपट विविध फिल्म फेस्टिवल्स मध्ये गाजला होता. याशिवाय अनेक मराठी लघुपट, वेबसिरीजचे दिग्दर्शन त्यांनी केले आहे. समर्थ रामदास स्वामींच्या भूमिकेतील विक्रम गायकवाड सध्या 'छोट्या बयोची मोठी स्वप्नं' या मालिकेत महत्त्वाचं पात्र साकारतायत याखेरीज 'उंच माझा झोका', 'स्वप्नांच्या पलिकडले', 'सत्यवान सावित्री' या मालिकाही त्यांनी केल्या आहेत. 'समांतर' या बहुचर्चित वेब सिरीजसोबतच सध्या लाइमलाईटमध्ये असलेल्या 'अथांग'मध्येही त्यांनी उत्तम भूमिका केल्यात. याशिवाय 'बंदिशाळा', 'शेर शिवराज', 'पावनखिंड' या चित्रपटांमध्ये विक्रमने साकारलेल्या व्यक्तिरेखाही प्रेक्षकांच्या पसंतीस उतरल्या आहेत. त्यांचा रामदास स्वामींच्या रूपातील लुक रिव्हील करत 'रघुवीर' चित्रपटाची अधिकृत घोषणा करण्यात आली आहे. पोस्टरवरील विक्रमचा लुक लक्ष वेधून घेणारा असून, 'रघुवीर'बाबतची उत्सुकता वाढवणारा आहे.

      संगीत नाटक अकादमी पारितोषिक विजेते अभिराम भडकमकर यांच्यासोबत निलेश कुंजीर यांनी पटकथा लेखन केले आहे तर अभिराम भडकमकर यांनी 'रघुवीर'चे संवादलेखन केलं आहे. मंदार चोळकरने लिहिलेल्या गीतांना संगीतकार अजित परबने स्वरसाज चढवला आहे. धनराज सुखदेव वाघ आणि प्रथमेश नितीन रांगोळे यांनी सिनेमॅटोग्राफी केली असून, जागेश्वर ढोबळे आणि प्रशांत चंद्रकांत कांबळे यांनी संकलन केलं आहे. सचिन सुहास भावे या चित्रपटाचे कार्यकारी निर्माते आहेत. या चित्रपटात ऋजुता देशमुख, शैलेश दातार, विघ्नेश जोशी, नवीन प्रभाकर, राहुल मेहदेंळे, भूषण तेलंग, वर्षा दांदळे, मौसमी तोंडवलकर, अनुश्री फडणीस, निनाद कुलकर्णी, देव निखार्गे, गणेश माने यांच्या देखील महत्त्वाच्या भूमिका आहेत.